पर्सा जिल्लाका दुई सरकारी अस्पतालले आमा सुरक्षा कार्यक्रम अन्तर्गतको प्रोत्साहन रकम नदिएको सेवाग्राहीहरूले गुनासो गरेका छन् ।
चालू आर्थिक वर्षको साउन महीनादेखि सङ्घ सरकार अन्तर्गतको नारायणी अस्पताल र स्थानीय सरकार अन्तर्गतको पोखरिया अस्पतालले यो कार्यक्रम अन्तर्गतको रकम वितरण नगरेको गुनासो आएको हो।
सरकारले सुत्केरी महिलाहरूलाई प्रोत्साहन स्वरूप एक हजार रुपैयाँ उपलब्ध गराउँदै आएको छ। यो सुविधा पहिले सरकारी अस्पतालहरूमा मात्रै उपलब्ध भएपनि पछिल्ला केही वर्षयता निजी अस्पतालहरूमा समेत यो रकम वितरण हुँदै आएको छ। तर नारायणी र पोखरिया अस्पतालले भने साउनदेखि सुत्केरी महिलाहरूलाई यो रकम दिन छाडेको सेवाग्राहीहरूले बताए ।
नारायणी अस्पतालकाे गुनासो
नारायणी अस्पतालका मेडिकल सुपरिटेन्डेन्ट डा. ऐनामुल हकले साउन महिनामा रोकिएको रकम अहिले वितरण गरिएको जानकारी दिए । उनका अनुसार नारायणी अस्पतालमा मासिक करिब ६५० जना गर्भवती महिलाले सुत्केरी सेवा लिने गरेका छन् । यस अवधिमा रकम नपाएका महिलाहरूलाई टोकन दिएर पछि रकम वितरणको व्यवस्था मिलाइएको पनि उनले बताए।
तर, एक कर्मचारीका अनुसार टोकन लिएका सेवाग्राहीहरूमध्ये २५ प्रतिशतले मात्रै अहिलेसम्म रकम लिन आएका छन् । त्यसमाथि, सम्बन्धित शाखाका कर्मचारीहरूको मिलेमतोमा अनियमितता हुने गरेको आरोप पनि उनले लगाए।
पोखरिया अस्पतालमा समेत समस्यामा
पोखरिया अस्पतालमा पनी अहिलेसम्म आमा सुरक्षा कार्यक्रम अन्तर्गतको रकम वितरण सुरु भएको छैन । निमित्त मेडिकल सुपरिटेन्डेन्ट डा. अनिल यादवका अनुसार साउनदेखि असोज ५ गतेसम्म सुत्केरी भएका २०९ जना महिलालाई बजेटको अभावका कारण रकम दिन नसकिएको हो ।
सरकारले रकम नपठाएकाले असमर्थ रहेको बताउँदै उनले टोकन दिइसकिएका सेवाग्राहीहरूलाई बजेट आएपछि रकम उपलब्ध गराउने जानकारी दिए ।
सरकारको सशर्त अनुदान कार्यक्रम अन्तर्गतको यो रकम अन्य शीर्षकमा खर्च गर्न नपाइने भएपनि केही अस्पतालहरूकाे रकम उपलब्ध नहुँदा अन्य शीर्षकबाट मिलान गरी वितरण गर्दै आएका छन् ।
-1729593135.jpg)
-1731330003.png)
