काठमाडौं । नेपाली राष्ट्रिय महिला फुटबल टोलीकी कप्तान एन्जिला तुम्बापो सुब्बाले यस पटकको दक्षिण एसियाली फुटबल महासंघ (साफ) महिला च्याम्पियनसिपको उपाधि घरमै राख्ने दाबी गरेकी छन् ।
आज साझ ६ः३० बजे साविक विजेता बंगलादेशविरुद्ध हुने फाइनल खेलअघि आयोजित प्रिम्याच कन्फरेन्समा बोल्दै एन्जिलाले उपाधि बाहिर जान नदिने प्रतिबद्धता जनाएकी हुन्। ‘अहिलेसम्म हामीले साफ च्याम्पियनसिपको उपाधि जित्न सकेका छैनौं । यस पटक भने जसरी पनि उपाधि घरमै राख्ने अभियानमा छौं,’ एन्जिलाले भनिन् ।
उनले यस पटक उपाधि जित्न नसके नेपालले अर्को उपाधिका लागि अझै ८–१० वर्ष कुर्नुपर्ने बताइन् । ‘हामी लयमा छौं, यो हाम्रो लागि सुवर्ण अवसर हो । यसपटक पनि उपाधि जित्न सकेनौं भने ८–१० वर्ष कुर्नुपर्ने हुन सक्छ,’ उनले थपिन् । नेपाली टोलीका मुख्य प्रशिक्षक राजेन्द्र तामाङले पनि यस पटक विगतका गल्ती नदोहोर्याएर उपाधि जित्ने बताउँदै खेलाडीमा आत्मविश्वास रहेको जनाए । ‘पाँच पटक फाइनल खेले पनि अहिलेसम्म उपाधि हात पार्न सकेका छैनौं । त्यसैले यस पटक जसरी पनि उपाधि जित्ने अभियानमा छौं,’ प्रशिक्षक तामाङले भने ।
त्यस्तै, बंगलादेशका प्रशिक्षक पिटर बटलरले फाइनल खेल प्रतिस्पर्धात्मक हुने भन्दै रोचक खेल हुने बताए । ‘हामी साविक विजेता हौं, त्यसैले सबैभन्दा ठूलो चुनौती हामीलाई छ । फाइनल खेल रोचक हुनेछ,’ उनले भने । बंगलादेशकी कप्तान सविना खातुनले नेपाल बलियो प्रतिद्वन्द्वी भएको र खेल कठिन हुने बताइन् ।
सातौं संस्करणको साफ च्याम्पियनसिपको फाइनल खेल बुधबार त्रिपुरेश्वरस्थित दशरथ रंगशालामा हुनेछ । सेमिफाइनलमा नेपालले भारतलाई टाइब्रेकरमा ४–२ ले पराजित गर्दा बंगलादेशले भुटानलाई ७–१ ले पराजित गर्दै फाइनल यात्रा तय गरेका हुन् । यो नेपाल र बंगलादेशबीच साफ च्याम्पियनसिपको उपाधिका लागि दोस्रो भेट हुनेछ ।
अघिल्लो संस्करणमा नेपाललाई ३–१ ले हराउँदै बंगलादेशले उपाधि जितेको थियो ।
अखिल नेपाल फुटबल संघ एन्फाले जावलाखेल चोकबाट बिहान ८ बजेदेखि टिकट बिक्री सुरु गरेको छ । फाइनल खेलमा प्रधानमन्त्री समेत सहभागि हुने आयोजकले जनाएको छ ।
-1729995576.jpeg)
