बारा जिल्लाको महागढीमाई नगरपालिका २ स्थित ऐतिहासिक गढीमाई मन्दिरमा शनिवारदेखि पञ्चवर्षीय गढीमाई मेला विधिवत् रुपमा शुरू भएको छ ।
प्रत्येक पाँच वर्षमा मङ्सिरको पहिलो दिनदेखि लाग्ने यस मेलामा नेपाल, भारत, बङ्गलादेश, भुटानलगायतका विभिन्न देशबाट लाखौँ भक्तजन सहभागी हुने गर्छन् । मङ्सिर महिनाभरि चल्ने मेलामा दर्शन, पूजापाठ, भाकल पूरा गर्न र विभिन्न जनावरहरूको बलि दिने परम्परा रहेको छ । यस वर्ष मङ्सिर २३ गते राँगाको बलि र २४ गते बोकालगायत अन्य पशुपक्षीको बलिको मिति निर्धारण गरिएको छ ।
मेलाको विधिवत् रुपमा उद्घाटन भएसँगै भक्तजनहरूको घुइँचो बढेको गढीमाई मेला व्यवस्थापन समितिका महासचिव वीरेन्द्र प्रसादले जानकारी दिए । दशैंदेखि नै विभिन्न स्थानबाट भक्तजनहरूको आगमन जारी रहेको बताउँदै उनले मेलालाई व्यवस्थित बनाउन विभिन्न व्यवस्था गरिएको जनाए ।
व्यवस्थापनका विशेष पहल
मेलालाई सुरक्षित र व्यवस्थित बनाउन समितिले अस्थायी शौचालय, घुम्ती शौचालय, स्वास्थ्य उपचार शिविर, एम्बुलेन्स र वारुण यन्त्रहरूको व्यवस्था गरेको छ । साथै, पिउने पानी र बासका लागि पनि विशेष प्रबन्ध मिलाइएको छ । बरियारपुरमा धर्मशालाको निर्माणसँगै स्थानीय घरहरूमा पनि बासको सुविधा प्रदान गरिएको छ ।
गढीमाई मेलाको महत्त्व
पशुबलिका लागि विश्वव्यापी रूपमा प्रसिद्ध गढीमाई मेला धार्मिक, सांस्कृतिक र पर्यटकीय दृष्टिले महत्वपूर्ण मानिन्छ ।
यसले नेपाल र छिमेकी मुलुकबीचको धार्मिक सम्बन्धलाई समेत सुदृढ बनाउने विश्वास गरिएको छ । मेलामा लाखौँ भक्तजनको सहभागिता हुने अपेक्षा गरिएको छ । प्रशासन, स्थानीय निकाय र स्वयंसेवी संस्थाहरूले मेलालाई सफल बनाउन लागेका छन् ।
-1729995576.jpeg)
