समाचार लेखेकै कारण धम्की दिने मेयरलाई कारबाही गर्न पत्रकार महासंघको माग

नेता गिरी

Home
नेता गिरी
समाचार लेखेकै कारण धम्की दिने मेयरलाई कारबाही गर्न पत्रकार महासंघको माग

समाचार लेखेकै कारण धम्की दिने मेयरलाई कारबाही गर्न पत्रकार महासंघको माग

काठमाडौं । नेपाल पत्रकार महासंघले धरानका मेयर हर्क साम्पाङलाई कारबाहीको माग गर्दै नेपाल सरकारसँग हस्तक्षेपको अपिल गरेको छ ।

महासंघकी अध्यक्ष निर्मला शर्माको नेतृत्वमा गएको प्रतिनिधिमण्डलले गृहमन्त्री रमेश लेखकलाई सोमबार भेटेर यस विषयमा ध्यानाकर्षण गराएको हो । महासंघले सुनसरीस्थित धरानका पत्रकार गोपाल दाहाललाई समाचार लेखेकै कारण धम्की दिने, गालीगलौज गर्ने र थप समाचार लेख्न नदिनेसम्मका गतिविधिमा संलग्न मेयर साम्पाङ र उनका समर्थकलाई कारबाही गर्न माग गरेको छ ।

महासंघले गृहमन्त्रीलाई बुझाएको ज्ञापनपत्रमा प्रेस स्वतन्त्रता हननको यस घटनाले राज्यको प्रेसप्रतिको धारणा र प्रतिबद्धतामाथि गम्भीर प्रश्न खडा गरेकाे उल्लेख छ । महासंघले घटनाको स्थलगत अध्ययनका लागि गठन गरेको मिसनको प्रतिवेदन अनुसार, मेयर साम्पाङ र उनका समर्थकले पत्रकार दाहाललाई समाचार लेखेकै कारण ज्यानको धम्की दिएको उल्लेख छ ।

महासंघको प्रतिवेदनले मेयर साम्पाङले श्रमदानबाट संकलन गरेको रकम उपमहानगरको खातामा जम्मा नगरी निजी खातामा राखेको र उक्त रकम पारदर्शी रूपमा प्रयोग नभएको पनि औंल्याएको छ । यसले स्थानीय सरकारको आर्थिक कारोबारमाथि गम्भीर प्रश्न खडा गरेको महासंघको भनाइ छ ।

महासंघको ज्ञापन बुझ्दै गृहमन्त्री लेखकले प्रेस स्वतन्त्रता हननका घटनामा संलग्नलाई कानुनी कठघरामा उभ्याउन राज्य प्रतिबद्ध रहेको बताउँदै दोषीमाथि कारबाही गर्ने आश्वासन दिएका छन् ।

प्रकाशित मिति: सोमबार, माघ १४, २०८१ १८:३४

यस वीरगंज सिटीमा प्रकाशित सामग्रीबारे कुनै प्रतिक्रिया, सल्लाह सुझाव वा कुनै लेख, रचना, समाचार प्रकाशित गराउनु परे birgunjcity1@gmail.com मा पठाउन सक्नुहुन्छ।

प्रतिक्रिया दिनुहोस्