उपराष्ट्रपति रामसहाय यादवले केडिया आँखा अस्पतालको सेवा सराहनीय रहेको बताएका छन् ।
रामकुमार महावीर आँखा अस्पतालको स्वर्ण महोत्सवको अवसरमा सोमबार आयोजित कार्यक्रममा बोल्दै उपराष्ट्रपति यादवले अस्पतालले ५० वर्षमा गरेको उल्लेखनीय सेवाको प्रशंसा गर्दै अबका दिनहरूमा अझ मजबुत भएर सेवा प्रदान गर्न आग्रह गरे ।
उनका अनुसार अस्पतालको गुणस्तरीय सेवाका कारण पर्सा, बारा, रौतहट, मकवानपुरसहित छिमेकी देश भारतको बिहारबाट समेत बिरामीहरू उपचारका लागि आउने गरेका छन् ।
आँखा सम्बन्धी १८ प्रकारका उपचार सेवा दिइरहेको जानकारी पाउँदा आफूलाई खुसी लागेको बताउँदै उपराष्ट्रपति यादवले भने, 'यो अस्पतालले लामो समयदेखि सेवा प्रदान गर्दै आएको छ । अब यसमा नयाँ प्रविधिको उपयोग गर्दै देशकै नमुना आँखा अस्पताल बनाउन जरुरी छ ।'
विगतका कमी कमजोरी सुधार्दै सेवा गुणस्तर बढाउनु आवश्यक रहेको उनको सुझाव छ । साथै, अस्पतालले प्रदान गर्दै आएको सेवाको स्तर अझ उच्च बनाउनेतर्फ ध्यान दिनुपर्ने उपराष्ट्रपति यादवले सुझाव दिए ।
उनका अनुसार अस्पताललाई नमुना बनाइएमा यो देशकै प्रमुख आँखा अस्पतालको रूपमा विकास हुन सक्नेछ ।
केडिया आँखा अस्पतालले अहिलेसम्म २७ लाख जनाको आँखाको जाँच गरिसकेको छ भने ४ लाखभन्दा बढी व्यक्तिको आँखाको शल्यक्रिया सम्पन्न गरेको छ । अस्पतालका अध्यक्ष राजेन्द्रकुमार केडियाको अध्यक्षतामा कार्यक्रम सम्पन्न भएको थियो ।
-1729995576.jpeg)
