सप्तरी – सप्तरी जिल्लाको सप्तकोशी नगरपालिका–१ फत्तेपुर बजार क्षेत्रमा सोमबार बिहान बाघको आक्रमणमा परी तीन जना स्थानीय घाइते भएका छन् ।
प्रहरी चौकी फत्तेपुरका अनुसार बाघले रक्तमाला टोल र खोरिया टोल नजिकै ४३ वर्षीय कृष्ण विष्ट, ५५ वर्षीय गणेश खत्री र रिजना गोसाइलाई आक्रमण गरेको हो । बाघले उनीहरूलाई पाखुरा, काखी मुनि र आँखाको डिलमा पञ्जाले कोतरेको छ ।
घाइतेहरूलाई स्थानीय मोडेल क्लिनिक फत्तेपुरमा प्राथमिक उपचारपछि थप उपचारका लागि विराटनगर रेफर गरिएको छ ।
बाघ खोरिया टोलस्थित परालको टाल मुनि लुकेर बसेको फत्तेपुर प्रहरी चौकीका प्रहरी नायव निरीक्षक पनालाल चौधरीले जानकारी दिए। घटनाबारे कोशी टप्पु वन्यजन्तु आरक्षलाई सूचित गरिएपछि नेपाली सेनासहित वन प्राविधिक टोली र आरक्ष कर्मचारी घटनास्थल पुगेका छन् ।
बाघले बजार क्षेत्रमै आक्रमण गरेपछि स्थानीयबासी त्रसित बनेका छन् । कोशी टप्पु आरक्षबाट आउने जंगली जनावरको आक्रमणले सयौं स्थानीय त्रासमा बाँच्न बाध्य भएका छन् ।
गृह मन्त्रीको निर्देशन, बाघ नियन्त्रण प्रयास जारी
मधेश प्रदेशका गृह, सञ्चार तथा कानुन मन्त्री राजकुमार लेखीले फत्तेपुर बजार क्षेत्रको अनुगमन गर्दै सुरक्षाकर्मीलाई बाघ नियन्त्रणमा लिएर थप क्षति रोक्न निर्देशन दिएका छन् । नेपाल प्रहरी, सशस्त्र प्रहरी र नेपाली सेनाको टोली बाघ नियन्त्रणमा जुटेको जिल्ला प्रहरी कार्यालय सप्तरीका प्रहरी उपरीक्षक ढकेन्द्र खतिवडाले जानकारी दिए ।
कोशी टप्पु वन्यजन्तु आरक्ष क्षेत्र आसपासका बासिन्दा हात्ती, अर्ना, बँदेललगायत जंगली जनावरको आक्रमणबाट वर्षौंदेखि पीडित छन् । स्थानीय पारस दाहालका अनुसार हात्ती र अर्नाको आक्रमणका कारण अघिल्ला वर्षहरूमा थुप्रै मानवीय क्षति भइसकेको छ ।
बाघ अझै नियन्त्रणमा आउन सकेको छैन । सुरक्षाकर्मी र वन अधिकारीहरू बाघलाई सुरक्षित रूपमा समातेर जंगल फर्काउने प्रयासमा छन् । स्थानीयहरू भने आफ्नै घरभित्र पनि असुरक्षित महसुस गरिरहेका छन् ।
-1729995576.jpeg)
