"अधिकार, समानता र सशक्तिकरण" भन्ने नाराका साथ ११५औं अन्तर्राष्ट्रिय नारी दिवसको अवसरमा वीरगञ्जमा शान्ति र्याली तथा कोणसभा सम्पन्न भएको छ ।
वीरगञ्ज घण्टाघरबाट सुरु भएको शान्ति र्याली नगर परिक्रमा गर्दै माइस्थान मन्दिर परिसरमा कोणसभामा परिणत भएको थियो । जिल्ला प्रशासन कार्यालय, जिल्ला प्रहरी कार्यालय, सशस्त्र प्रहरी बल, नेपाल विद्युत प्राधिकरण, वीरगञ्ज नर्सिङ क्याम्पस, प्याब्सन, क्वेस्ट फार्मास्युटिकल्स लगायत विभिन्न सरकारी तथा गैरसरकारी संस्था लगायतका व्यक्तीहरूकाे सहभागिता रहेको थियो ।
कोणसभालाई सम्बोधन गर्दै प्रमुख जिल्ला अधिकारी गणेश आर्यालले नेपाल सरकारले महिला सशक्तिकरण, लैङ्गिक समानता, तथा विभेदको अन्त्यका लागि प्रभावकारी नीति अवलम्बन गरिसकेको उल्लेख गर्नुभयो । उहाँले संविधान अनुसार कुनै पनि धर्म, परम्परा वा सामाजिक संरचनाका आधारमा हुने विभेद, शोषण, तथा अन्याय रोक्न सरकार प्रतिबद्ध रहेको बताएका थिए ।
कार्यक्रममा आमा नेपाल फाउन्डेसनकी अध्यक्ष प्रमिता मानन्धरले महिला सशक्तिकरण, प्रविधिमा पहुँच विस्तार, तथा शिक्षाद्वारा आत्मनिर्भर बनाउने लक्ष्यसहित अन्तर्राष्ट्रिय नारी दिवस मनाउने परम्पराको महत्व बारे जानकारी गराएकी थिइन ।
आमा नेपाल फाउन्डेसनको व्यवस्थापन तथा संयोजनमा सम्पन्न भएको कार्यक्रममा महिलाका अधिकार प्रवर्द्धन गर्ने प्रतिबद्धता जनाउँदै कार्यक्रम समापन गरिएको थियो ।
-1729995576.jpeg)
